JOSE Mourinho amesema ameshamkabidhi makamu mwenyekiti wa Manchester United, Ed Woodward majina ya wachezaji wapya anaowataka kwenye kikosi chake msimu ujao.
Wakati Mourinho akifichua hilo, kiungo wake ghali Paul Pogba amefichua kitu kuhusu moja ya mastaa wanaotarajiwa kutua Old Trafford kwenye dirisha lijalo la usajili baada ya kulitaja jina la Antoine Griezmann akiwa kwenye basi wakati wakielekea kwenye ndege yao baada ya kuichapa Ajax na kubeba taji la Europa League juzi Jumatano.
Kwenye video yake aliyotuma live kupitia Instagramu, Pogba alikuwa akiwataja mastaa wa Man United mmoja mmoja, kisha akashangilia kwa staili ile ya Griezmann kabla ya kusema maneno haya ambayo yanaonyesha wazi staa huyo wa Ufaransa anakwenda Old Trafford.
“Griezmann hayupo…bado hajaja!,” alisikika Pogba akisema kwenye video hiyo.
Baada ya kuchukua tu ubingwa wa Europa League na kufuzu kucheza Ligi ya Mabingwa Ulaya msimu ujao, Mourinho alionekana kuwapiga kijembe wapinzani wake kwenye Ligi Kuu England kabla ya kugeukia usajili utakavyokuwa kwa msimu ujao.
“Ed Woodward anayo orodha yote, kile ninachotaka, kile ambacho ninachopenda kuwa nacho na nilimpa listi hiyo kwa zaidi ya miezi miwili iliyopita,” alisema Mourinho na kuongeza: “Hivyo kazi ni kwake pamoja na wamiliki.”
Wachezaji wanaohusishwa na Man United ni Griezmann, James Rodriguez, Gareth Bale, Willian, Nemanja Matic na staa wa AS Monaco, Kylian Mbappe, na Mourinho alisema staa huyo anayetajwa kuwa na thamani inayozidi Pauni 70 milioni anakaribishwa sana Old Trafford.
0 comments :
Post a Comment